පවතින වර්ජන තත්ත්වය යටතේ වුවද අද(15) උදෑසන 08:00 වනවිට දුම්රිය ගමන්වාර 20ක් ක්‍රියාත්මක කිරීමට දුම්රිය සේවකයින් සමත්වී ඇති බව දුම්රිය සාමාන්...
මේ අතර අද උදෑසන ධාවනය කළ කාර්යාල දුම්රිය වෙත පොලිස් සහ යුද හමුදා ආරක්ෂාව යොදා තිබුණි.
දුම්රිය ගැන පොලිස්පතිවරයාගේ දැනුම් දීම
ශ්‍රී ලංකා දුම්රිය සේවය අත්‍යවශ්‍ය සේවයක් බව ප්‍රකාශ කරමින් දුම්රිය සාමාන්‍යාධිකාරිවරයා විසින් ඊයේ (14) පෙරවරුවේ නිවේදනයක් මගින් දන්වා සිටි අතර එමගින් අද (15) දින සියලුම දුම්රිය සේවකයන්ගේ නිවාඩු අවලංගු වන බවත් සියලුම සේවකයන් සේවයට වාර්තා කළ යුතු බවත් දන්වා තිබේ.
එසේ තිබිය දී කඩාකප්පල්කාරීන්ට ඉඩ නොදී දුම්රිය සේවාව බාධාවකින් තොරව පවත්වාගෙන යාම සඳහා අවශ්‍ය ආරක්ෂාව සැපයීම සම්බන්ධයෙන් පොලිස්පතිවරයා විසින් විශේෂ නිවේදනයක් ද ඊයේ (14) නිකුත් කොට ඇත. එහි මෙසේ සඳහන්ව ඇත
"දිවයින තුළ අත්‍යවශ්‍ය සේවාවන් හරියාකාරව පවත්වා ගැනීම සඳහා සහ ජන ජීවිතය යථා පරිදි පවත්වාගෙන යාම සඳහා අඛණ්ඩව දුම්රිය සේවාව පවත්වාගෙන යාමට දුම්රිය දෙපාර්තමේන්තුව විසින් අවශ්‍ය පියවර ගෙන ඇත.
ඇතැම් පිරිස් විසින් දුම්රිය ධාවනය කඩාකප්පල් කිරීම සඳහා සැලසුම් කරන බවට සහ අඛණ්ඩ දුම්රිය සේවාවක් පවත්වාගෙන යාමට බාධා කිරීම සඳහ සූදානම් වන බවට බුද්ධි අංශ වෙත තොරතුරු ලැබී ඇත.
දිවයින තුළ මහජන සාමය පවත්වාගෙන යාමටත් කඩාකප්පල් ක්‍රියා වැලැක්වීමටත් අවශ්‍ය උපරිම ක්‍රියාමාර්ග ගැනීම ශ්‍රී ලංකා පොලිසිය පරම වගකීම වන අතර ඒ අනුව කොට්ඨාශ භාර නිලධාරීන් විසින් තම කොට්ඨාශ බල ප්‍රදේශය තුළ කිසිම සිදුවීමක් සිදු නොවන ආකාරයට ක්‍රියා කිරීම සඳහා වැඩපිළිවෙළක් සකස් කර ක්‍රියාත්මක කළ යුතුය.
වැඩිමනත් වශයෙන් සියලුම මුපොප / ස්ථානාධිපතිවරුන් විසින් පහත ක්‍රියාමාර්ග අනුගමනය කළ යුතු බවට උපදෙස් ලබා දී අවශ්‍ය පහසුකම් සැලසීම සහ අධීක්ෂණය කිරීම සිදුකළ යුතුය.
සෑම දුම්රිය ස්ථානයක් ම ආවරණය වන පරිදි ප්‍රමාණවත් ආරක්ෂාවක් සැපයීම සහ ප්‍රධාන දුම්රිය ස්ථාන වලට වගකිවයුතු පරීක්ෂක ශ්‍රේණියේ නිලධාරියෙකු සමග නිලධාරී කණ්ඩායම් යෙදවීම.දුම්රිය මාර්ග වල කඩාකප්පල්කාරී ක්‍රියා වැලැක්වීම සඳහා මුරසංචාර යෙදවීම සහ හැකි සෑම අවස්ථාවකදී ම දුම්රිය දෙපාර්තමේන්තුවේ නිලධාරින් ඒකාබද්ධව දුම්රිය මාර්ගවල සංචාර සිදු කිරීම.
සේවයට වාර්තා කරන දුම්රිය සේවකයන් රාජකාරි වාර්තා කිරීම රාජකාරි යෙදී සිටීම සහ රාජකාරියෙන් බැහැරව වන අවස්ථාවලදී ඔවුන්ගේ ආරක්ෂාව සඳහා සුදුසු වැඩපිළිවෙළක් ක්‍රියාත්මක කිරීම.
No comments