ශ්රී ලංකාව අනුගමනය කරමින් නිකාබය සහ බුර්කාව තහනම් කරන්නැයි ඉන්දියාවේ ෂිව් සේනා සංවිධානය එරට අග්රාමාත්ය නරේන්ද්ර මෝදිගෙන් ඉල්ලා ඇත. ...
ඉන්දියාවේ හින්දු ජාතිකවාදී සංවිධානයක් වන ෂිව් සේනා සංවිධානය ශී්ර ලංකා රජය ගත් පියවර ප්රශංසාවට ලක් කරමින් අගමැති මෝදිගෙන් එම ඉල්ලීම කර ඇත.
පාස්කු ඉරිදා එල්ල වූ මරාගෙන මැරෙන බෝම්බ ප්රහාරවලින් පසුව හදිසි නීතිය යටතේ ආරක්ෂක අංශවලට පුද්ගලයන්ගේ අනන්යතාව සොයා ගැනීම උදෙසා අනන්යතාව තහවුරු කරගැනීමට බාධාවක් මුහුණු ආවරණ සියල්ල තහනම් කිරීමට ශ්රී ලංකා රජය පියවර ගත්තේය.
‘‘ශ්රී ලංකාව ගත් තීරණය අපිත් පිළිගන්නවා. ශ්රී ලංකාවේ අඩිපාරේ යමින් ඉන්දියාව තුළත් බුර්කාව සහ නිකාබය තහනම් කරන්නැයි අපි අගමැතිවරයාගෙන් ඉල්ලා සිටිනවා‘ යැයි ෂිව් සේනා සංවිධානය සඳහන් කර ඇත. එම සංවිධානය එම ඉල්ලීම කරමින් ‘සාමනා’ පුවත්පතේ කතුවැකියක් ද පළ කර ඇත.
බුර්කාව සහ ඉස්ලාම් දහම අතර කිසිදු සම්බන්ධයක් නැතැයි ද ඉන්දීය මුස්ලිම් කාන්තාවන් බුර්කාවෙන් සැරසෙන්නේ අරාබි ලෝකයේ සම්ප්රදාය අනුගමනය කරමින් යැයි ද ෂිව් සේනා සංවිධානය සඳහන් කර ඇත. අරාබියේ කාන්තාවන් බුර්කාව අඳින්නේ හිරු එළියෙන් ආරක්ෂා වීමට පමණක් යැයි ද එම සංවිධානය පෙන්වා දී ඇත.
ඉන්දීය ස්වදේශ කටයුතු අමාත්යාංශය මේ සම්බන්ධයෙන් අදහස් දැක්වීම ප්රතික්ෂේප කළේය. ඉන්දියාවේ ජනගහනය බිලියන 1.3ක් වන අතර එයින් සියයට 14ක් මුස්ලිම් ය.
No comments